افلاک پہ سجتے رہتے ہیں دن رات مسلسل تارے کیوں
بہروپ بدلتے رہتے ہیں دن رات مسلسل تارے کیوں

جس آگ کو روشن کرنے کی غائت بھی انہیں معلوم نہیں
اُس آگ میں جلتے رہتے ہیں دن رات مسلسل تارے کیوں

جب سامنے کچھ منظر بھی نہیں اور ان ہونی کا ڈر بھی نہیں
آنکھوں کو ملتے رہتے ہیں دن رات مسلسل تارے کیوں

کیوں دنیا سے منہ موڑ لیا، کس چاند سے رشتہ جوڑ لیا
! پلکوں پہ لرزتے رہتے ہیں دن رات مسلسل تارے کیوں

نظروں میں کوئی منزل بھی نہیں، دریا بھی نہیں، ساحل بھی نہیں
بے کار بھٹکتے رہتے ہیں دن رات مسلسل تارے کیوں

سوچوں سے اُدھر ، نظروں سے پرے ، اک باغ کہیں موجود ہے کیا
خوشبو میں ڈھلتے رہتے ہیں دن رات مسلسل تارے کیوں

جب ان کی کوئی تعبیر نہیں، جب کھلتی یہ زنجیر نہیں
خوابوں میں چمکتے رہتے ہیں دن رات مسلسل تارے کیوں

جب ان سے کوئی رشتہ بھی نہیں، بندھن بھی نہیں ، ناتا بھی نہیں
تقدیر بدلتے رہتے ہیں دن رات مسلسل تارے کیوں

کیا ان کے جہاں میں بھی امجد قانون ہے دھرتی والوں کا
تاروں کو نگلتے رہتے ہیں دن رات مسلسل تارے کیوں