Shakhsi o Taleemi Pas-e-Manzar:

Rizwan Ahmad Siddiqui, jo adabi dunya mein Rizwan Muqeem ke qalmi naam se pehchane jaate hain, 7 March 1991 (Ta-haal) ko Faisalabad mein paida hue. Aap ek aala taleem yafta, zahanat o qabiliyat rakhne wale nojawan hain.

Aap ne apni taleemi zindagi ka aaghaz Faisalabad se kiya, jahan Jinnah Ideal High Schoolse Matric aur Technical Teachers Training College se Inter ka imtihan paas kiya. Is ke baad aap ne Princeton University of Kohat se B.Tech (Civil Engineering) ki digri hasil ki. Taleem ke husool ko aage barhate hue aap ne Government College (GC) University Faisalabad se B.Sc (Double Math, Physics), M.S (Physics) aur B.Ed ki digriyan hasil keen.

Peshawarana Khidmat:

Rizwan Muqeem peshay ke etebar se Physics ke lecturer hain aur O & A Level ke talba o talibat ko Physics ke mazmoon ki taleem de rahe hain.

Adabi Safar, Fikr o Shu’oor:

Rizwan Muqeem urdu adab ke maidaan mein ek ubharte hue fahm-o-farasat wale nojawan shair hain. Aap bunyadi taur par Ghazal ke shair hain aur apni ghazalon mein nayab shairy, taza fikr aur unique adabi rang pesh karte hain.

• Adabi Asraat: Klasiki shairy mein aap Mirza Ghalib ke fikr o fan se mutasir hain, jabke jadeed shu’ara mein aap Sarwat Hussain, Aftab Hussain aur Azhar Farag ki shairy se elmi o adabi ta’assur hasil karte hain.

• Ishaa’at (Publications): Agarche abhi aap ka koi she’ri majmua (kitaab) shaye nahi hua, taham aap ki ghazalain Urdu ke namwar aur mu’atbar platforms par shaye ho kar adabi halqon mein pazeerayi hasil kar chuki hain, jin mein shamil hain:

  • Rekhta

  • Express Sunday Magazine

  • UrduPoint

  • Iqtibas Point

  • Bazm-e-Shuara Nida-e-Adab

A’azazat o Samaji Khidmat:

Aap ki adabi kaavishon ke e’teraf mein aap ko “Bazm-e-Naz Khayalvi Award” se nawaza ja chuka hai. Tadrees aur shairy ke sath sath aap milli o samaji sargarmiyon mein bhi pesh pesh hain. Aap “Paigham-e-Muhabbat Pakistan (Youth Wing)” tanzeem ke Sadr ki haisiyat se naujawanon ki tarbiyat aur falahi khidmat anjaam de rahe hain.

Namuna-e-Kalam (Selected Poetry)

Ghor karte hain to fitrat ka pata chalta hai

Dasht, tilon ke ta’aqub mein hawa rakhta hai

Hum tere paas bahane se chale aate hain

Teer ko fasla tay karna nahi padta hai

Iskay liye rakhta hoon raftaar mein aahista Muqeem

Teez chalta hoon falak paon mein aa lagta hai

Rukhta hoon bhao tao mein raftaar munfarid

So dhoondta hoon apna khareedar munfarid

Hichki mein rok leta hoon hanste hue, Muqeem

Kehte hain log mujh ko adakar munfarid

Aisa sukoon jahan mein milta nahi Muqeem

Seene se jab lagati hai maa choomne ke baad

Woh apne fan mein mahir aur kamil ho gaya hai

Kamaan tooti padi hai teer ghail ho gaya hai